Afgooye, 30-September-06 ( Qaadisiya.com) Golaha maxaakiimta islaamiga Soomaaliyeed ayaa maanta xaflad ballaaran oo ka dhacday beerta Sheekh Zaa'id Bin Suldaan Al-nahyaan Allaha u Naxriistee ee degmada Afgooye ayaa kula wareeegay maamulka gobolka Shabeelaha Hoose iyadoo xafladaasina ay ka qeyb galeen mas'uuliyiin sar sare oo golaha maxaakiimta ka tirsan.

Ka Daawo Halkani Sawirada Xafladda wareejinta Maamulka Sh/hoose.

Mas'uuliyiintii Xafladdaasi Maanta ka qeyb gashay ayaa waxaa kamid ahaa Guddoomiyaha Golaha Maxaakimta Islaamiga Soomaaliyeed Sheekh Shariif Sheekh Axmed, Guddoomiyaha Golaha Shuurada Sheekh Xasan Daahir Aweys, Kuxigeenka Sheekh Shariif Sheekh C/raxmaan Janaqow, Abuu Mansuur, Sheekh Yuusuf Indhacadde, Mas'uuliyiin kasocotay Maxkamadda Islaamiga ah ee Baladweyne iyo mas'uuliyiin kale oo aad u fara badan.

Waxaa halkaasi ka hadlay Mas'uuliyiin fara badan waxaana kamid ahaa Guddoomiyaha Golaha Maxaakimta Islaamiga Soomaaliyeed Sheekh Shariif Sheekh Axmed, wuxuuna halkaasi ka jeediyay Khudbad aad u dheer oo dhinacyo fara badan kaga hadlay.

Sheekh Shariif ayaa sheegay in Golaha Maxaakimtu Tallaabooyinka ay qaadayaan ay yihiin kuwa qorsheysan oo aanan jirin cid ay uga baahan yihiin in ay u meeriyaan Halka ay hawlgaladooda ka fulinayaan iyo sida ay u kala horeeyaan.

Guddoomiye Sheekh Shariif waxa uu Ammaan ballaaran u soo jeediyay Maamulka iyo Mas'uuliyiinta Gobolka Sh/hoose oo uu sheegay in halgankii Muqdisho lagu xureynayay ay qeybta ugu weyn ka qaateen isla markaana maxaakimtu ay ku taageereen Naf iyo Maal intaba oo aysan waxba kala hagran.

Sheekh Shariif oo khudbaddiisii dhinacyo fara badan kaga hadlay ayaa u badneyn arrinta uu ka hadlay Dhanka Gobolka Shabelaha Hoose, wuxuuna sheegay in wixii laga sheegi jiray Maanta wixii ka dambeeyo ay dhexda ka baxayaan Inshaa Allaah.

Sidoo kale Xafladdii Maanta waxaa ka hadlay Madaxa Ammaanka Golaha Maxaakimta Islaamiga Soomaaliyeed Sheekh Shariif Sheekh Axmed wuxuuna sheegay in Maanta wixii ka dambeeya uu iska wareejiyay Maamulka Gobolka Sh/hoose oo uu ku wareejiyay Golaha Maxaakimta Islaamiga Soomaaliyeed.

Sheekh Yuusuf Indhacadde ayaa tibaaxay in maanta wixii ka dambeeya Arrimaha Gobolka Sh/hoose lagula xisaabtami doono Golaha Maxaakimta Islaamiga Soomaaliyeed Maadaama uu isaga maamulka ku wareejiyay Golaha.

Sidoo kale waxa uu balan qaaday Sheekh Yuusuf in uu lasii shaqeyn doono Golaha Maxaakimta Islaamiga Soomaaliyeed isla markaana uu laba jibaari doono hawsha uu maxaakimta u hayo Inshaa Allaah.

Xafladda ayaa intii ay socotay laga dheehan karay Beeta Sheekh Zaa'id Bin Suldaan Al-nahyaan uu ku lahaa Degmada Afgooye oo Xafladdii Maanta lagu dhigay Shacbiga Soomaaliyeed oo ay wehliyaan Mas'uuliyiin aad u fara badan oo wada takbiirsanaya.

Lawareegidda Golaha Maxaakimta Islaamiga Soomaaliyeed ay lawareegeen Maamulka Gobolka Sh/hoose ayaa soo afjareysa Dacaayaddii ay ka fidinayeen Munaafiqiinta Golaha Maxaakimta Islaamiga Soomaaliyeed.

Dhinaca kale Xafladdii Maanta waxaa xusuus mudan oo kuwada sugnaa Guud ahaan Mas'uuliyiintii kala duwanaa ee Maamulka Gobolka Sh/hoose iyagoo si aad ahna ugu faraxsanaa lawareegitaanka Golaha Maxaakimta islaamiga Soomaaliyeed ay lawareegeen Guud ahaan Gobolka Sh/hoose, waxaana lafilayaa Dhowaan in Golaha ay u hawlgalaan Dhismaha Maamul ay u wada dhan yihiin Shacbiga Gobolka Sh/hoose in looga dhiso halkaasi.